Aetna est mons in Sicilia insula, ex quo erumpit ignis cum sulphure, quem ad modum in gehenna, ut dicit Isidorus lib. 14. capite 6. Hic mons ab illa parte, qua flat Eurus vel Affricus, habet speluncas plenas sulphuris usque ad mare deductas, quae speluncae in se recipientes fluctus, ventum creant, qui agitatus, ex sulphure ignem gignit, unde et incendium fumosum ad terram, ab hoc monte crumpere consuevit, sicut ibidem dicit Isidorus.

In hoc etiam monte saepe dicuntur apparere quaedam figurae et audiuntur saepe ab incolis terrae circa montem Aetnae gemitus et voces querulosae: unde a plerisque creditur, quod ibi sint loca poenalia, in quibus animae aliquae puniuntur, quod tamen non assero, sed beatus Gregorius in dialogo suo videtur de hoc facere mentionem.

Back to Introduction

Back to Excerpt